பெங்களூரில்  நடந்த குதிரை பந்தயத்தில், முதலில் ஓடி வந்த குதிரையில் இருந்து ஜாக்கி தவறி விழுந்ததால் வெற்றி பறிபோன சோகத்தில், பந்தய பணத்தை திருப்பிக்கேட்டு சூதாட்டக்காரர்கள் ரேஸ் அலுவலகத்தை அடித்து உடைத்தனர். கவிழ்த்துவிட்ட குதிரையால் பஞ்சரான பந்தய களம் குறித்து விவரிக்கின்றது இந்த செய்தி தொகுப்பு..

சென்னை கிண்டியில் ஒரு காலத்தில் கொடி கட்டி பறந்த குதிரை பந்தய சூதாட்டமானது மக்கள் நலன் கருதி தடை செய்யப்பட்டது. அதன் நினைவாக அண்ணா மேம்பாலம் அருகே சிலை ஒன்றும் வைக்கப்பட்டுள்ளது. ஆனால் கர்நாடக மாநிலம் பெங்களூருவில் தற்போதுவரை குதிரை பந்தய சூதாட்டம் அரசு அனுமதியுடன் நடந்து வருகின்றது.

பெங்களூருவில் "2019- 20ம் ஆண்டுக்கான குளிர்கால குதிரைப்பந்தயம் வெள்ளிக்கிழமை பிற்பகல் 2 மணிக்கு தொடங்கியது. முதல் பரிசாக இரண்டரை லட்சம் ரூபாய், இரண்டாம் பரிசு ஒரு லட்சத்து 25 ஆயிரம் ரூபாய், என 6 பரிசுகள் அறிவிக்கப்பட்டிருந்தன. இதனால் பலர் குதிரைகளின் மீது ஆர்வமாக பந்தயம் கட்டினர்.

இந்த நிலையில் பந்தயம் தொடங்கிய சில நிமிடத்தில் மழையின் காரணமாக சேதமடைந்திருந்த தடத்தில், குதிரைகள் வேகமாக ஓட முடியாமல் திணறியபடியே சென்றன. போட்டி தொடங்கியதில் இருந்தே 10 ஆம் நம்பர் குதிரை முன்னனியில் இருந்தது. 12 ஆம் நம்பர் குதிரை இரண்டாம் இடத்தில் இருந்தது.

எல்லைக்கோட்டை நெருங்க 200 மீட்டர் தொலைவே இருந்த நிலையில் முதலில் வந்த 10 ஆம் நம்பர் குதிரையின் ஜாக்கி குதிரையின் வேகத்தை அதிகரிக்க எழுந்து நிற்க முயன்றார். ஏற்கனவே மைதானம் வழுக்கும் தன்மையில் இருந்ததால் குதிரை நிலை தடுமாறியது.

அதற்குள்ளாக 12 ஆம் நம்பர் குதிரையின் ஜாக்கி குதிரையில் இருந்து கீழே விழ, அவரை தொடர்ந்து 10 நம்பர் குதிரையின் ஜாக்கியும் கீழே விழுந்ததால் முதல் பரிசு, கிடைக்கும் என்றும், 2 வது பரிசு நமக்கு தான் என்றும் ஆவலோடு காத்திருந்த சூதாட்டகாரர்களுக்கு பெருத்த ஏமாற்றமானது. இதில் பின்னால் வந்து கொண்டிருந்த மற்றொரு ஜாக்கியும் கீழே விழுந்தார்.

இந்த போட்டி தொடர்பான வீடியோவை பெங்களூரு குதிரை பந்தய கிளப் தனது இணையத்தில் வெளியிட்டுள்ளது. மழையால் சேதமான பந்தய மைதானத்தில் குதிரைகளை ஓடவிட்டதால் 2 குதிரைகளும் நிலை தடுமாறி ஜாக்கிகளை கவிழ்த்து விட்டதாக குற்றஞ்சாட்டிய சூதாட்டக்காரர்கள் தாங்கள் கட்டிய பணத்தை திரும்ப கொடுக்குமாறும் குதிரைப்பந்தய கமிட்டிக்கு கோரிக்கை வைத்தனர்.

ஆனால் அவர்களோ திட்டமிட்டபடி பந்தயம் முடிந்துவிட்டதால் பணத்தை திருப்பித் தர இயலாது என கைவிரித்ததால் ஆத்திரமடைந்தவர்கள் ரேஸ் கோர்ஸ் வளாகத்தில் இருந்த சேர்களை தூக்கிப்போட்டு உடைத்து புக்கிங் அலுவலகத்தையும் அடித்து நொறுக்கி சூறையாடினர்.

இது தொடர்பாக போலீசாருக்கு தகவல் அளிக்கப்பட்டதை தொடர்ந்து அங்கு வந்த போலீசார் கலாட்டாவில் ஈடுபட்ட நபர்களை விரட்டிய போலீசார், சிலரை கைது செய்து அப்புறப்படுத்தினர். இதனால் இந்தபோட்டிக்கு பின்னர் நடைபெற இருந்த ஆறு பந்தயங்களும் ரத்து செய்யப்படுவதாக அறிவிக்கப்பட்டது.

நம் வாழ்க்கையும் இந்த குதிரை பந்தயம் போலத்தான் வெற்றியை நெருங்கிக் கொண்டிருப்பதை போல தோன்றும், எதிர்பாராமல் நிகழும் சில இடையூறுகள் நம்மை குப்புற தள்ளும், அதில் விழாமல் லாவகமாக தப்பி வருபவர்களால் மட்டுமே வெற்றி என்ற இலக்கை அடைய முடியும் என்பதற்கு இந்த பந்தய காட்சிகள் ஒரு சாட்சி..!

https://www.polimernews.com/dnews/88913/குதிரை-கவுத்திடுச்சிப்பா..!பஞ்சரான-பந்தய-களம்..!சூதாட்டகாரர்கள்-ஆவேசம்

 

என்னடா இது இந்தக் குதிரைகளே இப்படித்தான் .....பரீட்சையிலும்  கவுக்குது , பந்தயத்திலும் கவுக்குது ........!   🐎