ந(ர)கர வாழ்க்கையில் ஓசைபடாமல் நடந்துகொண்டிருக்கும் நிழல் உலகம் பற்றி லிங்குசாமியின் பங்குக்கு எடுத்திருக்கும் படம். கெட்டவர்களுக்கு கெட்டவனாக நல்லவர்களுக்கு நல்லவனாக வாழும் நாயகன் பாணியிலான தாதா பிரகாஷ்ராஜ்.

அவருக்கே வித்தை காட்டும் அதிரடி நாயகன் விக்ரம். பிரகாஷ்ராஜின் ஆட்கள் செய்து முடிக்க வேண்டிய காரியங்களை விக்ரமின் புஜபலமும் புத்திசாலித்தனமும் முந்திக்கொண்டு முடிக்கிறது.

என்ன வேணும் உனக்கு? நேருக்கு நேர் மிரட்டும் பிரகாஷூக்கு பயப்படாத விக்ரம், அடியாளில் ஒருவராய் சேர்த்துக்கொள்ளப்பட ஆரம்பமாகிறது உயிர் வேட்டை.

போலீஸ் தூரத்தலில் ஒரு வீட்டின் ஓட்டை பிய்த்துக்கொண்டு குதிக்கும் விக்ரம், த்ரிஷாவின் மீது விழுந்து புரள, இதுவரை பார்த்திராத ஹீரோயின் சந்திப்பையும் அதனால் ஏற்படும் காதலையும் காட்சிப்படுத்தியிருக்கும் இயக்குனரின் 'புதிய' சிந்தனையை பாராட்டும் கொடுமைக்கு ஆளாகிறோம். இன்னொரு தாதா ரகுவரனின் எதிர்ப்பு, புதிய போலீஸ் கமிஷனராக வரும் ஆசிஷ்வித்யார்த்தி வைக்கும் குறி உட்பட சகல எதிர்ப்புகளையும் சந்திக்கும் பிரகாஷ்ராஜின் அத்தனை சுமைகளையும், தனது தலையில் தூக்கி சுமக்கும் விக்ரமையும் ஒரு கட்டத்தில் தடம்மாற்றுகிறது காதல். அவரது வாழ்க்கையின் முடிவு என்னவாகிறது என்பது க்ளைமாக்ஸ்.

ஏற்கனவே வந்த தாதாயிச படங்களின் சாயல் இந்த கதையிலும் தென்படுவதே முதல் உறுத்தலாகிவிடுகிறது. அதை சொன்ன விதத்தில் மட்டும் காமிராமேன், ஸ்டண்ட் மாஸ்டர், காசை தண்ணீராய் செலவழித்திருக்கும் தயாரிப்பாளர் உதவியுடன் கொஞ்சம் உட்கார செய்கிறார் இயக்குனர்.

பத்துபேர் சூழ்ந்தாலும் ஒற்றை ஆளாய் அடிக்கும் விக்ரமை நம்பமுடிகிறது. அதற்கான உழைப்பு அவரது கட்டுமஸ்தான உடம்பில் காணமுடிகிறது. 'வா...வா...வா...' என சொல்லியழைத்து பின்ணியெடுக்கும் காட்சிகளில் சிங்கமாய் சிலிர்க்கும் விக்ரமிற்கு 'சத்தான' பாராட்டுக்கள். த்ரிஷாவின் மரணம் கண்டு துவண்டு விழும்போது பிரமாதம்.இந்த கதைக்கு தேவையில்லாத கேரக்டராய் திணிக்கப்பட்டிருக்கும் த்ரிஷா, பாவம் நடிக்க சந்தர்ப்பமின்றி தவித்திருக்கிறார். தன்மேல் விழுந்து புரண்ட ஒரே காரணத்திற்காக விக்ரம் மேல் காதலாகி கசிந்துருகுவதெல்லாம் காமெடி. வீட்டுக்கு தெரியாமல் விக்ரம் கட்டும் தாலியை ஏத்துக்கொள்வதும் நியாயமாக தெரியவில்லை.

பெரியவராக வரும் ரகுவரன், பிரகாஷ்ராஜின் வலக்காரமாக வரும் தலைவாசல் விஜய் உட்பட பலருக்கும் ஏற்கனவே நடித்து சலித்த அதே கேரக்டர்கள்தான். ஆசிஷ்வித்யார்த்தி மட்டும் நல்ல போலீஸ் அதிகாரியாக காட்டப்பட்டிருக்கிறார்.

படத்தின் இன்னொரு ஹீரோ ஒளிப்பதிவாளர் ஆர்.டி. ராஜசேகர்தான். ஆங்கில படங்களுக்கு நிகரான நேர்த்தியை கண்டுகளிக்கமுடிகிறது. ஹாரிஸ் ஜெயராஜின் இசையில் 'ரகசிய கனவுகள்...', 'எனதுயிரே...' பாடல்கள் கேட்க கேட்க திகட்டாத மெலடி மெட்டுக்கள். பின்னணி இசையில் துப்பாக்கி சத்தத்திற்கு அதிகமாக உழைத்திருப்பதை புரிந்துகொள்ளமுடிகிறது.

வசனம் எழுதுவதற்கு தனியாக எஸ். ராமகிருஷ்ணன். 'உங்களோட ஒரு நாள் வாழும் வாழ்க்கையே போதும்...' எத்தனையோ படங்களில் கேட்டு புளித்த வரியை எழுதுவதற்கு எஸ்.ராமகிருஷ்ணன் எதற்கு என்பது புரியவில்லை.

இரண்டாம் பாதியில் காட்டியிருக்கும் விறுவிறுப்பையும், மேக்கிங் ஸ்டைலையும் முதல் பாதியில் காட்டியிருந்தால் பீமா இன்னும் பலமானவனாக இருந்திருப்பான்.

"ஒருவன் தேர்ந்தெடுக்கும் பாதையே

அவனது முடிவையும் தீர்மானிக்கிறது"

க்ளைமாக்ஸில் வரும் இந்த வசனம் படத்திற்கும் பொருந்தும்.

பாவம் த்ரிஷா, வழக்கமாக நடிக்க முடியாமல் தவிப்பார். இந்தப் படத்தில் நடிக்க வழியில்லாமல் தவிக்கிறாரா? காமெடிதான் போங்கள்.

அதனால்தான் அவரை சாகடித்துவிட்டார்களோ என்னமோ? (படத்தில்).

('பீமா' தந்த சோதனை: விக்ரமின் வேதனை)

--------------------------------------------------------

வழியாக வெளியாகிவிட்டது 'பீமா' இரண்டு வருட காலம் இதற்காக தியாகம் செய்த விக்ரமை தியாகிகள் விஸ்டில் சேர்க்குமளவிற்கு நிறைய இழந்துள்ளாராம்.

நேற்று நிருவர்களை சந்தித்தவர் தனது சோதனைகளையும் வேதனைகளையும் பங்கிட்டுக்கொண்டார்.

" 'பீமா' கதையின் க்ளைமாக்ஸ் என்னை மிகவும் பாதித்ததாலேயே அதில் நடிக்க ஒப்புக் கொண்டேன். ஆனால் படம் வெளிவருவதில் ஏகப்பட்ட சிக்கல்கள் ஏற்பட்டது. இந்த இரண்டு வருடத்தில் வேறு எந்த படத்திலும் நடிக்க ஒப்புக்கொள்ளவில்லை. இடைப்பட்ட காலங்களில் இரண்டு மூன்று படங்களில் நடித்திருந்தால் பத்துகோடி ரூபாய்வரை சம்பாதித்திருப்பேன்.

ஆனால், 'பீமா' மேல் இருந்த எனது அசைக்க முடியாத நம்பிக்கை காரணமாக புதிய படங்களை ஒப்புக்கொள்ளவில்லை. 'சேது' படம் வெளியாவதிலும் இப்படித்தான் பல சிக்கல்கள் இருந்தது. ஆனால் அந்த படத்தில் கூட நான் இவ்வளவு வேதனையை அனுபவிக்கவில்லை. யாரோ செய்த தவறுக்காக 'பீமா'வில் நான் தண்டனையை அனுபவிக்க வேண்டியதாகிவிட்டது.

படத்திற்கு கிடைத்துவரும் பாராட்டுகள் எனது கவலைக்கு மருந்தாக அமைந்துள்ளது. 'அந்நியன்' படத்தைவிட பிரமாதமாக இருப்பதாக சகநடிகர் ஒருவர் பாராட்டியுள்ளார். விநியோகஸ்தர்களுக்கு நல்ல லாபம் கொடுத்து வருகிறது" என தனது கவலைகளை இறக்கி வைத்தார் ச்சீயான்.

நீண்ட நாட்காக எதிர்பார்க்கப்பட்ட படம். வழக்கம்போலவே ரசிகர்களின் எதிர்பார்ப்பை பூர்த்தி செய்துவரும் விக்ரமின் படங்களில் இதுவும் சேரலாம். பாடல்கள் மிகவும் இனிமை. தம்மை இன்னொரு ரஜனியாக நினைத்து வரும் மற்றய நடிகர்களுடன் ஒப்பிடும்போது விக்ரம் அடக்கமானவர் என்பதுடன் நடிப்பிலும் கைதேர்ந்தவர் என்பது எனது எண்ணம்.

படத்தில் எனக்கு பிடித்தவை. கரிஸின் பின்ணணி இசை, பாடல்கள், கிளைமாக்ஸ்.

நன்றி நுனாவிலான், நான் இன்னும் படத்தைப் பார்க்கவில்லை. கட்டாயம் பார்க்க வேண்டும்.

இதைப்போல நிறைய படம் பார்த்தாகிவிட்டது படம் சுமார்தான்,பாடல்கள் பரவாயில்லை.

பீமாவை பற்றி விக்ரம்

http://eelamtube.com/3efbc24c7d2583be6925....பற்றி

படம் சுமார்தான். சண்டைக்காட்சிகளையும் பாடல்களையும் நீக்கி விட்டால் படத்தில் கதை என்று ஒன்றுமேயில்லை. இதைப்போய் ஆ..ஊ வென்று சொன்னார்கள். விக்ரம் இதில் நடித்திருக்கவே தேவையில்லை.