காதல் மனைவியின் கல்லறை அருகே குழி தோண்டி காத்திருந்த 98 வயது கணவர்

• பிரசன்னா வெங்கடேஷ்
• பிபிசி தமிழுக்காக

22 நிமிடங்களுக்கு முன்னர்

 

 

படக்குறிப்பு,

எம்.சி.குப்பன்

'காத்திருத்தல்' காதலில் சுகம் என்று சொல்வதுண்டு. ஆனால், 25 ஆண்டுகளுக்கு முன் இறந்து போன மனைவியின் மீதான காதலால், அவரது கல்லறைக்கு அருகிலேயே குழி தோண்டி வைத்து காத்திருந்து உயிர் விட்டிருக்கிறார் முன்னாள் ராணுவ வீரர் ஒருவர். 98 வயதாகும் அவரது பெயர் எம்.சி. குப்பன். ஆரணி அருகே உள்ள வண்ணாங்குளம் கிராமத்தில் வசித்து வருகிறார்.

"இத்தனை ஆண்டு காலமாக தனக்காக தானே தோண்டிய குழியை பராமரித்து வரும் இவர், தான் இறந்த பிறகு அந்த குழியில்தான் தன்னை அடக்கம் செய்ய வேண்டும் என தன் குடும்பத்தாருக்கு அறிவுறுத்தி வந்துள்ளார். தற்போது, அவர் ஆசைப்படி அவரது உடல் அவரது மனைவியின் கல்லறை அருகே தோண்டப்பட்ட குழியில் நல்லடக்கம் செய்யப்பட்டது.

"இரண்டாம் உலக போரின் போது தன் தாயாரை விட்டு பிரிந்து இருந்த நேரமே அவர் மீது தனது தந்தை அதீத காதல் கொள்ள காரணமானது" என்கிறார் எம்.சி. குப்பனின் மகன் பிரபாகரன். பிபிசி தமிழிடம் இது பற்றி அவர் மேலும் கூறுகையில், "எனது தந்தை ராணுவத்தில் இருந்து ஓய்வு பெற்ற பிறகு ஆரணியை அடுத்த கண்ணமங்கலம் அருகே வண்ணாங்குளம் கிராமத்தில் சொந்தமாக ஒரு நிலத்தை வாங்கிப் பராமரித்து வந்தார். தாமோ தமது மனைவியோ இருவரில் யார் உயிரிழந்தாலும் அந்த இடத்தில் தான் நல்லடக்கம் செய்ய வேண்டும் என தொடர்ந்து கூறி வந்தார்.

1998ஆம் ஆண்டு எனது தாய் சாரதா அம்மாள் உடல் நலக்குறைவால் உயிரிழந்தார். அப்போது என் தந்தை கூறியது போல அதே இடத்தில் எனது தாயாரை நல்லடக்கம் செய்தோம்.

 

• "தேநீர், பிரியாணி, எல்லை கடந்த அன்பு" - பாகிஸ்தான் தோழி குறித்து இந்திய பெண் நெகிழ்ச்சி
• 20 வருடங்களுக்கு முன்பு தொலைந்த இந்திய பெண் பாகிஸ்தானில் கண்டுபிடிப்பு

 

 

படக்குறிப்பு,

தோண்டி வைக்கப்பட்ட குழி

மனைவி இறந்த பிறகு அடுத்த சில நாட்களிலேயே அவருக்காக ஓர் நினைவிடம் எழுப்பினார் எம்.சி. குப்பன்.

அதற்குப் பத்து நாட்களுக்குப் பிறகு, தமது மனைவியின் கல்லறைக்கு அருகில் ஒரு குழி தோண்டி, தான் இறந்த பிறகு மனைவியின் கல்லறைக்கு அருகே, இதே குழியில் தான் என்னை புதைக்க வேண்டும் என்று அவர் கூறி வந்துள்ளார்.

இது குறித்து எம்.சி. குப்பனின் மகன் கூறுகையில், "தினசரி காலை மற்றும் மாலை வேளையில் கல்லறைக்குச் சென்று தனக்காக தானே தோண்டிய குழியை சுத்தம் செய்வதை தந்தை வழக்கமாக கொண்டிருந்தார். ஒவ்வொரு அமாவாசை தினத்தன்றும் நினைவிடத்தில் பிரார்த்தனை செய்வார். மனைவி பிரிந்ததை அவரால் ஒருபோதும் ஏற்றுக்கொள்ள முடியவில்லை," என்றார்.

குப்பனின் பேத்தி இந்து, "என் தாத்தா கடந்த 25 ஆண்டு காலமாக என் பாட்டியின் நினைவு மண்டபத்தில் தான் வாழ்ந்து வந்தார். என் பாட்டியின் கல்லறை அருகே என் தாத்தா தனக்காக வெட்டிய குழியை ஒவ்வொரு நாளும் பராமரித்து வந்தார். குழியில் மண் சரிவு ஏற்பட்டு விடக்கூடாது என்பதால் பக்கவாட்டுச் சுவர்களில் செங்கற்களை வைத்துப் பராமரித்தார். 25 ஆண்டுகளுக்கு பிறகு இப்போது அவர் தனது மனைவியுடன் கைகோர்க்க போகிறேன் என்று அவர் இறக்கும் போது கூட மகிழ்ச்சியாகவே கூறி உயிர் விட்டார்," என்கிறார்.

1925ஆம் ஆண்டு நவம்பர் 4ஆம் தேதி பிறந்த குப்பனுக்கு வயோதிகம் காரணமாக கடந்த மே மாதம் உடல்நலக்குறைவு ஏற்பட்டது. அவரது உடலுக்கு ஒட்டுமொத்த கிராமும் வந்து அஞ்சலி செலுத்தி அவரது அழியாக காதலை நினைவுகூர்ந்துச் சென்றது.

https://www.bbc.com/tamil/india-62672700

அந்தக் காலத்து குப்பன் எண்டபடியால் காதல் முத்தி கிடங்கு வெட்டி காத்திருந்தார்.
இந்தக்காலத்து சுப்பன்கள் எல்லாம் அடுத்த நாளே இரண்டாம் கலியாணத்துக்கு ரெடி பண்ணிடுவானுவள்.😂

அந்தக் காலத்தில் பிள்ளைகள் இல்லாவிட்டால் முதல் மனைவி உயிரோடு இருக்கையிலேயே இரண்டாவது மனைவியுடன் குடும்பம் நடத்தி பிள்ளைகளை முதல் மனைவி வளர்த்த சம்பவங்களுடன் பார்க்கையில் இந்த குப்பன், வித்தியாசமானவர்தான்..

 

இந்தக் கல்லறை தான் உண்மையான காதல் நினைவுச் சின்னம் 'தாஜ்மஹால்'

வாழ்வை நன்கு அனுபவித்து வாழ்ந்திருக்கிறார்கள்

இறப்பின் பின்னரும் இணைந்து இருங்கள் 

12 hours ago, குமாரசாமி said:

அந்தக் காலத்து குப்பன் எண்டபடியால் காதல் முத்தி கிடங்கு வெட்டி காத்திருந்தார்.
இந்தக்காலத்து சுப்பன்கள் எல்லாம் அடுத்த நாளே இரண்டாம் கலியாணத்துக்கு ரெடி பண்ணிடுவானுவள்.😂

நீங்க எப்படி தல 😛😛