வவுனிக்குளத்திலிருந்து சடலமாக மீட்கப்பட்ட இளைஞன்: உடற்கூற்றுப் பரிசோதனையில் வெளியான அதிர்ச்சி தகவல்

[ஏராளன்]

வவுனிக்குளத்திலிருந்து (Vavuni) நேற்று சடலமாக மீட்கப்பட்ட இளைஞன் கழுத்து நெரிக்கப்பட்டு கொலை செய்யப்பட்டுள்ளார் என முல்லைத்தீவு(Mullaitivu) மாவட்ட சட்டவைத்திய அதிகாரி அறிக்கையில் தெரிவிக்கப்பட்டுள்ளது.

முல்லைத்தீவு யோகபுரம் மல்லாவி பகுதியினை சேர்ந்த ஆனந்தரசா ஜீவன் (வயது 27) என்ற இளைஞன் நேற்று (30.07.2024) வவுனிக்குளத்திலிருந்து சடலமாக மீட்கப்பட்டுள்ளார்.

நேற்று முன்தினம் (29) இரவு சுமார் இருபது இலட்சம் ரூபா பணத்துடன் யோகபுரத்தில் இருந்து பாண்டியன் குளம் சென்ற குறித்த இளைஞனை காணவில்லை என உறவுகள் தேடிய நிலையில் நேற்று (30) அதிகாலை வவுனிக்குளம் குளத்தில் உடலமாக மீட்கப்பட்டார்.

உடற்கூற்று பரிசோதனை

இந்நிலையில் சம்பவ இடத்திற்கு வருகைதந்து உடலத்தை பார்வையிட்ட முல்லைத்தீவு நீதிவான் நீதிமன்ற நீதிபதி எஸ் ஏச் மக்ரூஸ் உடலத்தை உடற்கூற்று பரிசோதனையின் பின்னர் உறவுகளிடம் ஒப்படைக்குமாறு தெரிவித்தார்.

இந்நிலையில் இன்று (31) முல்லைத்தீவு மாவட்ட வைத்தியசாலையின் உடற்கூற்றுப் பரிசோதனை இடம்பெற்றது.

உடற்கூற்றுப் பரிசோதனையின் முடிவில் குறித்த இளைஞன் கழுத்து நெரித்து கொல்லப்பட்டுள்ளதாக சட்ட வைத்திய அதிகாரியின் அறிக்கையில் குறிப்பிடப்பட்டுள்ளது.

சம்பவம் தொடர்பில் நட்டாங்கண்டல் காவல்துறையினர் சம்பவம் தொடர்பிலான மேலதிக விசாரணையை முன்னெடுத்து வருகின்றார்கள்.

https://ibctamil.com/article/vavunikulam-murder-youth-strangled-police-investig-1722427603

[தமிழ் சிறி]

20 லட்ச ரூபாய்க்காக ஒரு இளைஞன் கொலை.
பெரும் தொகை பணத்துடன் செல்லும் போது இரகசியமாக கொண்டு செல்லலாமே.
அது... மூன்றாம் ஆளுக்கு எப்படி தெரிய வந்தது. 
யாரோ... நன்கு அறிந்தவர்கள்தான் இதனை செய்து இருக்கின்றார்கள். 

[alvayan]

2 hours ago, தமிழ் சிறி said:

20 லட்ச ரூபாய்க்காக ஒரு இளைஞன் கொலை.
பெரும் தொகை பணத்துடன் செல்லும் போது இரகசியமாக கொண்டு செல்லலாமே.
அது... மூன்றாம் ஆளுக்கு எப்படி தெரிய வந்தது. 
யாரோ... நன்கு அறிந்தவர்கள்தான் இதனை செய்து இருக்கின்றார்கள். 

உண்மை ..அநியாய உயிரிழப்பு..மறுநாள் கனடாபயணம்..இந்த பெரும் சலசலப்பு எற்படுத்திய..கொலை...20 இலட்சம் எடுத்தவன்...அதே ஏஜன்சியிடம் பணம் கொடுத்து கனடா வருவார்...மனிதாபிமானம் அற்ற இனமாகிவிட்டதா நம்மினம்...நண்பர்களிடம் தொடர்ந்து உரையாடி இருக்கிறார்...என்பதுதான் கைலைட்..

[குமாரசாமி]

2 hours ago, தமிழ் சிறி said:

20 லட்ச ரூபாய்க்காக ஒரு இளைஞன் கொலை.
பெரும் தொகை பணத்துடன் செல்லும் போது இரகசியமாக கொண்டு செல்லலாமே.
அது... மூன்றாம் ஆளுக்கு எப்படி தெரிய வந்தது. 
யாரோ... நன்கு அறிந்தவர்கள்தான் இதனை செய்து இருக்கின்றார்கள். 

நம்பிக்கை துரோகம் என்பது நமது சமூகத்திற்கு கைவந்த கலை அல்லவா?

[தமிழ் சிறி]

2 minutes ago, குமாரசாமி said:

நம்பிக்கை துரோகம் என்பது நமது சமூகத்திற்கு கைவந்த கலை அல்லவா?

பாவம். வயது 27. வாழ்க்கையின் முக்கிய பகுதியில் காலடி எடுத்து வைக்கும் நேரம் மரணம். அடுத்த நாள் கனடா போக இருந்தவராம். அவரை நம்பி இருந்த குடும்பம் வாழ்க்கை முழுக்க சோகத்தில் வாழப் போகின்றார்கள்.  🥲

11 minutes ago, alvayan said:

உண்மை ..அநியாய உயிரிழப்பு..மறுநாள் கனடாபயணம்..இந்த பெரும் சலசலப்பு எற்படுத்திய..கொலை...20 இலட்சம் எடுத்தவன்...அதே ஏஜன்சியிடம் பணம் கொடுத்து கனடா வருவார்...மனிதாபிமானம் அற்ற இனமாகிவிட்டதா நம்மினம்...நண்பர்களிடம் தொடர்ந்து உரையாடி இருக்கிறார்...என்பதுதான் கைலைட்..

 

[புலவர்]

எவ்வளவு கஸ்ரப்பட்டு கடன்பட்டு குடும்பத்தை கரைசேர்க்க வேண்டும் என்ற கனவுடன் இருந்திருப்பார்.இவர் பணத்தோடு போகிறார் என்று தெரிந்தவ்கள்தான் இந்தக் கொடுமையைச் செய்திருக்கிறார்கள்..இவர்களைக் கடவுள்தான் தண்டிக்க வேண்டும்

[alvayan]

செய்திகளீன்படி பார்க்கையில் இவர் ஏஜன்ட் மூலம்தான் ..பணம் கொடுத்து கனடாவர முயற்சி துள்ளார் போலுள்ளது...மறுநாள் பயணத்துக்கு பணம் கொடுக்க  போயுள்ளார் ..போலி எஜென்ட்...தன் முகத்தை காட்டிவிட்டார்...அதாவது தன்னுடைய காசை இலகுவழியில் பெற்றுவிட்டார்...உயிர் ...மாற்றான் வீட்டுப்பிள்ளைதானே...ஆத்மா சந்தியடையட்டும்..

Edited August 1 by alvayan

[ஏராளன்]

இளைஞனின் மரணத்திற்கு நீதி கோரி மல்லாவியில் பாரிய ஆர்ப்பாட்டம்!

Published By: DIGITAL DESK 3   16 AUG, 2024 | 05:23 PM

இளைஞனின் மரணத்திற்கு நீதி கோரி மல்லாவி பகுதியில் பொதுமக்கள், பொது அமைப்புக்கள் மற்றும் வர்த்தக சங்கம் என்பன இணைந்து பாரிய அளவிலான கவனயீர்ப்பு போராட்டம் ஒன்றினை இன்று வெள்ளிக்கிழமை (16) காலை மேற்கொண்டிருந்தன.

கனடா செல்ல தயாரான மல்லாவி யோகபுரம் பகுதியினைச் சேர்ந்த ஆனந்தராசன் சஜீவன் என்ற இளைஞன் கடந்த 29.07.2024 அன்று காணாமல் போன நிலையில் மல்லாவி வவுனிக்குளம் பகுதியிலிருந்து மறுநாள் சடலமாக மீட்கப்பட்டார்.

19 நாட்களாகியும் குறித்த இளைஞனின் மரணத்திற்கு காரணமானவர்கள் எவரும் இதுவரை கைது செய்யப்படவில்லை என்பதுடன், பொலிஸாரின் விசாரணைகள் மந்தகதியில் நடப்பதாக கூறியும், துரித கதியில் விசாரணைகளை முன்னெடுத்து குற்றவாளிகளை நீதியின் முன் நிறுத்த வேண்டும் என்றும் கூறியே பொதுமக்கள் மற்றும் பொது அமைப்புக்களினால் இன்றையதினம் குறித்த போராட்டம் முன்னேடுக்கப்பட்டிருந்தது.

மல்லாவி மத்திய பஸ் நிலையத்தில் ஆரம்பமாகிய பேரணி மல்லாவி போலிஸ் நிலையம் வரை சென்றிருந்தது.

பின்னர் ஆர்ப்பாட்டத்தில் கலந்துகொண்டவர்கள் ஒன்று கூடி,

"சசீவன் மரணத்திற்கு நீதி வேண்டும்"

"கொலையாளிகளை நீதியின் முன் நிறுத்து"

"விசாரணைகளை துரிதப்படுத்தி நீதியை பெற்று தா"

"எமது நண்பனின் மரணத்திற்கு நீதி வேண்டும்"

"வஞ்சகரின் சூழ்ச்சிக்கு முடிவில்லையா"

"எமது பிள்ளைக்கு நீதி வேண்டும் "

போன்ற எதிர்ப்பு சுலோகங்களை ஏந்தியவாறு போராட்டத்தில் கலந்துகொண்டிருந்தவர்கள் கோஷமிட்டனர்.

இதேவேளை, குறித்த போராட்த்திற்கு ஆதரவாக இன்றைய தினம் மல்லாவி பகுதிகளில் வர்த்தக நிலையங்கள் யாவும் மூடப்பட்டிருந்தமையும் அவதானிக்க கூடியதாக இருந்தது.

ஆர்ப்பாட்டத்தில் கலந்து கொண்டவர்கள் மல்லாவி பொலிஸ் நிலையம் முன்பு ஒன்று கூடி வீதியை மறித்து ஆர்ப்பாட்டத்தில் ஈடுபட்டிருந்தவேளை, சம்பவ இடத்திற்கு வருகை தந்த மல்லாவி பொலிஸ் நிலைய பொறுப்பதிகாரி, குறித்த சம்பவம் தொடர்பான விசாரணைகள் இடம்பெற்று வருவதாகவும், இளைஞனின் படுகொலைக்கான நீதியினை தான் பெற்று தருவதாகவும் ஆர்ப்பாட்டத்தில் ஈடுப்பட்டிருந்தவர்களிடம் தெரிவித்திருந்தார்.

குறித்த காலப்பகுதிக்குள் துரித கதியில் விசாரணைகளை முன்னெடுத்து குற்றவாளிகளை நீதியின் முன் நிறுத்தாவிடின் பாரியளவிலான போராட்டம் ஒன்றினை தாம் மேற்கொள்வோம் என்றும், சுழற்சி முறையிலான உணவு தவிர்ப்பு போராட்டத்தினையும் தாம் முன்னெடுப்போம் என்றும் எச்சரித்து, பொலிஸ் பொறுப்பதிகாரியிடமும், வருகை தந்திருந்த பாராளுமன்ற அரசியல் பிரமுகர்களிடமும் மகஜர் ஒன்றும் கையளிக்கப்பட்டது.

இதேவேளை, குறித்த கவனயீர்ப்பு போராட்டத்தில் பாராளுமன்ற உறுப்பினர்களான செல்வராசா கஜேந்திரன், செல்வம் அடைக்கலநாதன் முன்னாள் பாராளுமன்ற உறுப்பினர் சாந்தி ஸ்ரீஸ்கந்தராசா ஆகியோர் கலந்துகொண்டிருந்தனர்.

https://www.virakesari.lk/article/191246