மாவீரர் துயிலிடத்தில் மாமாவைச் சந்திக்கும் துயரோடு

ஆளரவமற்ற வனாந்தரத்துப்

பெருமுகத்தில் அலைகிறது ஆன்மா.

மீள் பொழுதின் வரவில் - உன்

நினைவுகளைத் தெளித்துவிட்டுக்

கனவாகிப் போனாய்....

நீயெழுதிய கடிதங்கள்

மஞ்சள் கடதாசிப்பூக்கள்

மறக்காமல் அனுப்பும்

பிறந்தநாள் புத்தாண்டு

வாழ்த்து மடல்கள் - உன்

நினைவாய்க் கிடைத்தவைகள்

எல்லாம் கண் முன்னால்

உன்னை நினைவுபடுத்திபடி....

'போய் வருகிறோம்'

போர் நிறுத்த காலத்துச்

சந்திப்பு முடிந்து பிரியும் நேரம்

'சந்திப்போம்' என்றாய்

இன்று வந்த செய்தியுன்னை

இழந்தோமென்கிறது.

மாமாவின் மரணம் கேட்ட

உன் மருமக்கள் சொல்கிறார்கள்.

'கடிதம் மாமா'

இனியெங்களுக்கு இல்லை...

இதயம் நொருங்கிச் சிதிலமாகிறது.

அவர்கள் பகிரும்

உனது ஞாபகங்களில்....

மாமா தந்த சிலுவைப் பென்ரன்

மாமா தந்த ஐஸ் கிறீம்

மாமாவுடனான

மோட்டசயிக்கிள் பயணம்

மாமாவின் மடியில் விளையாடிய

நினைவென்று நீட்டுகிறார்கள்

நினைவுகளை.....

மாமா இல்லையினி

மாவீரர் துயிலிடத்தில் மாமாவைச்

சந்திக்கும் துயரோடு அவர்கள்....

எங்கடை மாமாக்களும் அன்ரியவையும்

ஏனம்மா சாகினம் ?

திருப்பிச் சுடலாம் தானே ஆமிக்காறனை...?

கேட்கிறான் உங்கள் பார்த்திக்குட்டி

சொல்ல வார்த்தையில்லை.

சொல்லியழ முடியவில்லை.

இன்னும் யாரை எவரையெல்லாம்

இழக்கப்போகிறோம்.....?

வரும் நாட்கள் இனியெந்தத்

தோழனைத் தோழியை

அண்ணனைத் தம்பியை

அக்காவையென எங்கள் வீரங்களைத்

தன்னோடு கூட்டிப் போகப்போகிறது...?

29.02.09

Edited March 11, 200916 yr by shanthy

தமிழீழ தமிழர் .நினைவுகள் .......தாயகம் நோக்கியிருக்க .மாவீரரை நினைக்கும்

கவிதை பொருத்தமானதே .....பாராட்டுக்கள்.

உண்மையாகவே அவர் உங்கள் மாமாவா சாந்தி? துயரம் தந்த கவிதை.

உண்மையாகவே அவர் உங்கள் மாமாவா சாந்தி? துயரம் தந்த கவிதை.

றதி கவிதையை மேலோட்டமாக வாசித்துள்ளீர்கள் போலுள்ளது. மாமாவின் மருமக்களின் எண்ணமும் ஓர் தோழமையின் பகிர்வாகவும் பதிவாகியுள்ளது கவிதை.

மாமாவின் மரணம் கேட்ட

உன் மருமக்கள் சொல்கிறார்கள்.

'கடிதம் மாமா'

இனியெங்களுக்கு இல்லை...

இதயம் நொருங்கிச் சிதிலமாகிறது.

அவர்கள் பகிரும்

உனது ஞாபகங்களில்....

கவிதையில் உங்கள் வலி சொன்ன உங்களுக்கு எனது அனுதாபங்களும், நாட்டுக்காக உயிர் நீத்த உங்கள் மாமாவுக்கு எனது வீரவணக்கங்களும்.

எத்தனை உறவுகள், எவ்வளவு ஞாபகங்கள், இங்கே இப்படியொரு வாழ்வு...? எவ்வளவு இழந்து விட்டோம்.. எங்கள் இரத்தங்களின் மரணத்திலும் பங்குகொள்ள முடியாத சோகம்....

ஆமாம்....! எங்கள் விடுதலை கிடைத்து விடியலின் ஒளி எங்கள் மண்ணில் பரவிக்கிடந்தாலும் எங்கள் எல்லோரினதும் மனங்கள் மட்டும் என்றும் இருளிலே மூடிக்கிடக்கும்...

இளங்கவி

லெப்.கேணல்.அருணன் (அருணா) அவர்களது 3ம் ஆண்டு நினைவுநாள் 27.02.2012.

அருணாண்ணையின் கையெழுத்து.....

மறக்க முடியாத நினைவுகளில் தத்தளிக்கும் மனங்களிற்கு அனுதாபத்தை மட்டுமே உரைக்கமுடியும் , ஆனால் ஆறுதல் கூறிடினும் மனமது துயர் கடந்து செல்லப்போவதில்லை...

சோதரனாய், மாமனாய் உறவினைத் தந்து, இன்று நினைவுகளை மட்டும் உங்களில் நிறுத்திவிட்டு சென்ற துயரம் நீளும். .... ஆயினும் அமைதி கொள்ளுங்கள் சாந்தி... தமிழனாய்ப் பிறந்தாலே இழப்புக்கள் என்றாகி விட்டது. ..

மண்ணுக்காக , மக்களுக்காக உயிர் நீத்த இம் மாவீரனுக்கு எனது வீரவணக்கங்கள்...!!!!!

அருணாண்ணாவின் 5ம் ஆண்டு நினைவுநாளின்று.

ஆண்டுகள் ஐந்து அகன்றோடிவிட்டது. ஆயினும் நினைவுகளில் துயர் சொரியும் ஞாபகங்கள்.

 

5ம் ஆண்டு வணங்கங்கள் அருணாண்ணா.

வருடம் தவறாது வந்த வாழ்த்து மடல்களிலும் கடிதங்களிலும் மட்டுமே உங்கள் நினைவுகள் மிஞ்சிக்கிடக்கிறது. அண்ணனாய் ,தோழனாய் , ஆசானாய், மாமனாய் , கடிதம்மாமாவாய் எம்மோடு வாழ்ந்த வீரனே ! இன்றுங்கள் நினைவுநாள் இதயம் முட்டிய துயரோடு உங்களை நினைவு கூருகிறோம்....