சமீபத்தில் நண்பரகளுடன் அளாவளாவியபோது பகிர்ந்தது..இங்கே யாழிலும் பகிர்கிறேன்..

காகத்துக்குப் புரிந்த உண்மை!

கணவன் - மனைவி உறவை உடைய வைக்கும் விஷயம் "EGO" என்ற அகங்காரம்.

"நான் தான் குடும்பத்துக்கு தேவைப்படும் வருமானத்தை சம்பாதிக்கிறேன்" என்று கணவனோ அல்லது " நான் மட்டும் என்ன குறைச்சலா?" என்று மனைவியோ செயல்பட ஆரம்பித்தால் குடும்ப வாழ்க்கை வெலவெலத்துப் போய்விடும்.

காகம் ஒன்று மாமிச துண்டை பார்த்ததும், பறந்து வந்து அதை கவ்வி எடுத்ததும்.......மற்ற காகங்களும் இதை விரட்ட ஆரம்பிக்கின்றன!. மாமிச துண்டை காப்பாற்றிக்கொள்ள காகம் உயர உயர பறக்க, மற்ற காகங்களும், கழுகுகளும் சளைக்காமல் துரத்துகின்றன. ஒரு கட்டத்தில் காகம் மாமிச துண்டை நழுவ விட்டு விடுகிறது! அவ்வளவுதான், இத்தனை நேரம் இதைத் துரத்தி வந்த பறவைகள் தரையில் விழுந்த மாமிசத்தை நோக்கி ஓடி விடுகின்றன!

காகத்துக்கு மற்ற பறவைகளிடமிருந்து விடுதலை கிடைத்து விடுகிறது. அப்போதுதான் அந்த காகத்துக்குப் புரிந்ததாம், " நான் மாமிச துண்டை இழந்தது என்னவோ உண்மை! ஆனால், நான் இப்போது பெற்றிருப்பது எத்தனை பெரிய சுதந்திரம்?" என்று!

நமக்குள் இருக்கும் அகங்காரம் கூட இந்த மாமிசத் துண்டைப் போலத்தான். இதை நீங்கள் விட்டுவிட்டால் வாழ்க்கை லேசானதாக ஆகிவிடும்! டென்ஷனே இருக்காது காக்கைக்கு வானத்தின் அழகு தெரிந்த மாதிரி உங்களுக்கு வாழ்க்கையின் அழகு கண்ணுக்கு தெரியும்.

கணவன் மனைவி உறவு பலமடைய இன்னொரு முக்கிய தேவை அன்னியோன்யம்!

அம்மா, அப்பா, சகோதரன், சகோதரி, கணவன் - மனைவி, பிள்ளைகள்....இவர்கள் அனைவருமே நம் பாசத்துக்கு உரியவர்கள்தான். ஆனால், பல சமயங்களில் நாம் சில விஷயங்களை இவர்களோடு பகிர்ந்து கொள்வதில்லை. அதே சமயம், நண்பர்களோடு மணிகணக்கில் உட்கார்ந்து பேசுவோம்! கால போக்கில் நமக்கும் அந்த நண்பருக்கும் இடையே ஒரு பெரிய அன்னியோன்யம் வளரும்!

"ஆபிஸ் விஷயங்களை எல்லாம் நான் வீட்டில் பேசுவதில்லை." என்று சிலர் பெருமையே அடித்து கொள்வர். காரணம் கேட்டால்.... "மனைவியிடம் ஆபிஸ் விஷயங்களை சொன்னால் அதை அவளால் சரியாக புரிந்து கொள்ள முடியாது. வீணாக குழப்பி கொண்டு கவலைபடுவாள்" என்பர் சிலர். இது ஓரளவு உண்மையும் கூட. ஆனால், இந்த சின்ன தடையை தாண்டுவது பெரிய விஷயம் அல்ல!

" இந்த பிரச்னையை நீ இப்படி சமாளி! இப்படி செய்! அப்படி செய்!" என்று எடுத்ததற்கெல்லாம் யோசனை சொல்லாமல், அவர் மனம் திறந்து பேசுவதற்கு வசதி செய்து கொடுத்தாலே போதும். இருவருக்கும் உள்ள அன்னியோன்யம் அற்புதமாக வளரும்!

அன்னை தெரைசாவின் அற்புதமான சொற்றொடர் ஒன்று உண்டு......

" மற்றவர்களை எடை போடுவதில் காலத்தை செலவழிக்காதீர்கள்! ஏனெனில், அவர்களை நேசிக்க உங்களுக்கு நேரம் இல்லாமல் போகும்"

வத்தலோ, வடாமோ போட வேண்டும் என்று குடும்ப தலைவி நினைத்தால், அப்போது இவளுக்கு உதவியாக வரும் பக்கத்து வீடு மாமியிடமோ, அத்தையிடமோ அந்த குடும்பத் தலைவிக்கு கொஞ்சம் நெருக்கம் உருவாகிறது இல்லையா? இதே சைகாலஜி கணவன்-மனைவி உறவுக்கும் பொருந்தும்.

கணவன் ஒரு குறிக்கோளை அடைய மனைவி உதவியாக இருப்பதும், மனைவியின் லட்சியத்தை அடைய கணவன் உதவி செய்வதும், இருவருக்கும் இடையே ஒரு நெருக்கம் அதிகரிக்க உதவும்!

வாழ்க வளமுடம் .............என்றும் ஆனந்தமாய்!

.

அருமையான பாடம் பகிர்வுக்கு நன்றி............

:D

குடும்ம உறவுகளுக்குள் அகங்காராம் இருக்கக்கூடாது என்பதை காகத்தின் கதை மூலம் கூறியமைக்கு நன்றி வன்னியன்.

படிப்பினையான விடயங்கள் உதாரணங்களுடன் அருமை, வன்னியன்.

பொடியன்களிடம் எடுபடுமா..வரவேற்க்கப்படுமா..என்ற தயக்கதுடனேயே பதிந்தேன். பாராட்டிய,பார்வையிட்ட,(அகங்)காரத்தைவிட்ட அனைவருக்கும் நன்றி.

ஒரு சிக்கலான விடயத்தை இலகுவாக்கும் கதை. பாராட்டுக்கள்.

காகம் மசால் வடா திருடுவதை கேட்டிருக்கிறேன். இந்த காகம் நான்வெஜ் போல.

காகம் வடையைத் தூக்கிக் கொண்டு போன கதை கேள்விப்பட்டிருக்கிறேன்.

மற்றக் காகங்கள் அதைக் கலைத்துச் சென்று ஒரு காகத்துக்கும் வடை இல்லாமல் போனதைப் பற்றி இப்ப தான் யோசிக்கிறன்.

நன்றி வன்னியன் அண்ணா

வாத்தியார்

*********