மயங்கொலிச் சொற்கள் என்பன தமிழில் கிட்டத்தட்ட ஒரே வடிவிலான எழுத்துருக்களை கொண்டவைகளாகவும், முற்றிலும் வேறுபட்ட பொருள் கொண்டவைகளாகவும் காணப்படும். இவ்வாறான சொற்கள் ஒலிப்பின் போது நுண்ணிய வேறுபாடுகளை மட்டுமே கொண்டிருப்பதால் எது சரி, எது தவறு என மயங்க வைப்பவைகளாக இருக்கும். அதனாலேயே இவற்றை மயங்கொலிச் சொற்கள் என்றழைக்கப்படுகின்றன.

நாம் அதிகமாக இந்த எழுத்துக்களில் தவறு செய்கிறோம். அவற்றை பற்றி ஒரு அறிதலை ஏற்படுத்தவே இந்தப் பதிவு. கவிதை எழுதுபவர்கள் இதனை கவனத்தில் கொண்டால் கவிதை இன்னும் சிறப்பாக இருக்கும்.  என்னுடைய ஒரு சிறிய முயற்சி தான் இந்தக் மயங்கோகொலி சொல் விளையாட்டு.
கவிதை எனக் கொண்டாலும் சிறப்புதான்

குழவியுடன் குலவியிருக்கும்போது குளவியோன்று
கடியிலிருந்து கடிதாக வந்து கடித்ததினால்
கோளையில் வைத்த கோலைக்கறியை  புசிக்க முடியாத கோழையானேன்
எந்த தலத்தில் வலிதீர்க்க தழம் கிட்டுமோ 
முற்றத்தில் கோளமிட்டு தன் கோலம் திருத்தி 
சோலியணிந்து  சோளிதூக்கி சோழியன்வீதி சென்றவளை இன்னும் காணவில்லை
மழைத்துளிதரு  துழிதங்கும் துலிபோல் அசைந்து வருகிறாளோ??

..........
கிளியைக்கண்டுகூட  கிலி கொள்ளும் எனக்கு பொற்கிழி தகுமா ??  


குழவி - குழந்தை; குலவி - மகிழ்ச்சி; குளவி - ஒருவகை வண்டு;
கடி - அரண்மனை; கடிதாக - விரைவாக; கடி - கவ்வுதல் ;
கோளை - குவளை,பாத்திரம்; கோலை - மிளகு; கோழை - வீரமற்றவன்;
தளம் - மேடை, மாடி வீடு; தலம் - இடம்;  தழம் - தைலம்;
கோளம் - மாவினால் படம் வரைதல்; கோலம் - அழகு;
சோலி - ரவிக்கை; சோழியன்  - சோழி உருட்டுபவன்;சோளி - கூடை;
துளி - மழைத்துளி; துழி - பள்ளம்; துலி - பெண் ஆமை
கிளி - பறவை ; கிலி -அச்சம்; கிழி - பணமுடிப்பு;

Edited December 29, 201213 yr by ஆதித்ய இளம்பிறையன்

நல்ல விடயத்தை பகிர்ந்திருக்கிறீர்கள் இளம்பிறையன். சமீப காலமாக யாழின் கவிதைக்களத்தில் இப்படியான தவறுகள் அதிகம் தென்படுகின்றன. சுட்டிக் காட்டுவது பலருக்குப் பிடிப்பதில்லை. அதற்காக தனிமடல் எழுதி தெரிவிப்பது சில சமயங்களில் மற்றவர்களிடம் கெஞ்சுவது போன்ற பிரமையை அவர்களின் பதில் உருவாக்கிவிடும் அத்தகைய அனுபவங்களைக்கடந்திருக்கிறேன். அத்தோடு ஒத்த கருத்துள்ள சொற்களையும் கவிஞர்கள் மிகவும் கவனத்தில் கொள்ளவேண்டும். காரணம் கவிதை சொற்சிக்கனமானது, நீண்டு செல்லும் வசனங்களகக் கொண்ட கட்டுரை வடிவங்கள் அல்ல அதனால் ஒத்த சொற்கள் உடனடியாகவே பொருளை உணர்த்திவிடும். எழுதும், எழுத விளையும் கவிஞர்கள் கருத்தில் கொள்வது நல்லது. எழுத்துப்பிழைகள் எல்லோருக்கும் வரும். பல சமயங்களில் எனக்கும் வந்திருக்கின்றன. சக நண்பர்கள் சுட்டிக்காட்டும்போது திருத்தம் செய்த சந்தர்ப்பங்களும் ஏராளம். இத்தகைய பக்குவம் எல்லோரிடத்திலும் இல்லை.

கடி வேறு கவ்வுதல் வேறு.
சோழி தான் இரவுக்கையாக இருக்கும். சோலி  என்பது வேலையைக் குறிப்பது.
எதற்கும் இன்னொருமுறை சரிபாருங்கள் ஆதித்தியன்.

நன்றி வல்வை.

இணையத்தில் எழுதும் மிகப் பெரும்பாலானோர் ஆங்கில கல்வியை பின்புலமாக கொண்டவர்களாக இருக்கிறார்கள். அவர்கள் பேச்சு வழக்கில் உள்ள வார்த்தைகளைக் கொண்டு உணர்வை கவிதையாக கொட்ட விழைகிறார்கள். அவர்களுக்கு இதைப்பற்றி ஒரு அறிதலை ஏற்படுத்திவிட்டால் அவர்களது தேடல் எல்லை விரிவடைந்து, புதிய புதிய வார்த்தைகள் நமக்கு கிடைக்குமே என்ற தமிழாசை தான்.  நமது பாட்டன், பூட்டன், முப்பாட்டன் தமிழை பாதுகாத்து பல உயரிய சிந்தனைகளை நமக்கு கொடுத்துள்ளார்கள். நாமும் நமது பிழைகளை திருத்தி தமிழை அதன் தன்மை கெடாமல் அடுத்த தலைமுறைக்கு கொடுப்போம்.

 

 

கடி வேறு கவ்வுதல் வேறு.
சோழி தான் இரவுக்கையாக இருக்கும். சோலி  என்பது வேலையைக் குறிப்பது.
எதற்கும் இன்னொருமுறை சரிபாருங்கள் ஆதித்தியன்.

 

 

 

நன்றி சுமேரியர்.

நானறிந்த வரையில் நான் கொண்ட அர்த்தம் சரியென்றே நினைக்கிறேன். மயங்கொலிச் சொற்கள் பற்றி தினமணி கட்டுரையில் வந்த கட்டுரையில்  "சோலி" அர்த்தம் காணவும்.

 

சோலி - ரவிக்கை, காரியம்

 

சோலி என்ற வார்த்தைக்கு வேலை என்ற மற்றொரு பொருளும் உண்டு.

Refer : http://dinamani.com/weekly_supplements/tamil_mani/article1308537.ece


கடி என்பதற்கு பற்களால் பிரித்தெடுத்தல்/கவ்வி எடுத்தல்;
Refer : http://ta.wiktionary.org/wiki/%E0%AE%95%E0%AE%9F%E0%AE%BF

இந்த வார்த்தைகளின் பயன்பாடு பற்றி வேறு ஏதேனும் சங்கப் பாடல்களிலோ/ அகராதியிலோ கண்டால் அறியத் தரவும்.

Edited December 29, 201213 yr by ஆதித்ய இளம்பிறையன்

சோலி.. இதுக்கு இரவிக்கை என்று அர்த்தம் கொடுக்கக் கூடாது.. அது இந்திச் சொல் Choli ஐக் குறிக்கும்.

 

கீழ்க்கண்ட படத்தில் காணவும்.

 

 

 

மழைத்துளிதரு  துழிதங்கும் துலிபோல் அசைந்து வருகிறாளோ??

 

சொல்லால் சிலம்பம் ஆடிய ஆதித்ய இளம்பிறையனாருக்குப் பாராட்டுக்கள் . என்னைப் பொறுத்தவரையில் கவிதைக்கு மொழியில்லை என்பேன் . ஒன்றை நினைத்து எழுத , அது பல்வேறு மொழிபெயர்புகளை வாசகர்களுக்கு கொடுத்தால் அதை வெற்றிக்  கவி தை என்பேன் .

இசை, இந்த மாதிரி படத்தைப் போட்டால் வேற சோலியை(வேலையை) எப்படிப் பார்ப்பது?

நன்றி கொற்றவா !!

அருமையான ஒருவிடயத்தை எடுத்திருக்கிறீர்கள்..மிகவும் பயனுள்ளது...நன்றி அண்ணா..

வரவுக்கு நன்றி சுபேஸ்.

தமிழில் நிறைய அழகிய சொற்கள் இருக்கின்றன. அவற்றை எழுத்துக்களில் எடுத்தாள்பவர்கள் குறைவு. எனினும் தற்போதைய இலக்கிய உலகில் உள்ள ஒரு சிலர் தமிழின் செழுமையை வெளிக்காட்டியே வருகின்றார்கள்.

 

 

கோளம் - மாவினால் படம் வரைதல்; கோலம் - அழகு

 

கோளம் - உருண்டை. பூமி கோள வடிவிலானது என்று படித்திருக்கின்றேன்.

சோலி.. இதுக்கு இரவிக்கை என்று அர்த்தம் கொடுக்கக் கூடாது.. அது இந்திச் சொல் Choli ஐக் குறிக்கும்.

 

கீழ்க்கண்ட படத்தில் காணவும்.

 

 

இதில் எதைப் பார்க்க  இசை 

கோளம் - உருண்டை. பூமி கோள வடிவிலானது என்று படித்திருக்கின்றேன்.

 

 

நீங்கள் சொல்வதும் சரியே கிருபன். ஒரு சொல்லுக்கு பல பொருள்கள் உண்டு அதன் பயன்பாட்டைப் பொருத்து.

நான் தமிழை கற்றுக் கொண்டுதான் இருக்கிறேன். நான் அறிந்தவற்றிலிருந்து எழுத முயன்றேன். தவறு எனில் திருத்திக் கொள்ளவே எண்ணுகிறேன்.

நான் எழுதியது  இதன் அடிப்படையில்.

கோடுதல் = வளைதல்

கோடு -> கோட்டம் = வளைவு

கோளம் = கோட்டம்

Edited December 31, 201212 yr by ஆதித்ய இளம்பிறையன்