எனக்கு மிகவும்பிடித்த குணசித்திர & நகைச்சுவை நடிகர் டெல்லிகணேஷ்.

மரணம் எவருக்கும் சலுகை தரபோவதில்லை.  காலங்கள் ஓடினால் காலமாக்கிவிடும்

ஐயாவுக்கு அஞ்சலிகள்.

 

3 நாட்களாக ஏற்பட்ட கஷ்டம்.. இரவு 11.30 மணிக்கு நடந்த சம்பவம்.. டெல்லி கணேஷ் மறைவிற்கு என்ன காரணம்?

சென்னை: பழம்பெரும் நடிகர் டெல்லி கணேஷ் (80) உடல்நலக்குறைவு காரணமாக காலமானார். சென்னை ராமாபுரத்தில் உள்ள இல்லத்தில் உயிரிழந்ததாக தகவல் வெளியாகி உள்ளது. அவரின் மரணம் நிகழ்ந்தது எப்படி என்பது தொடர்பான விபரங்கள் வெளியாகி உள்ளன.

வயது முதிர்வு மற்றும் உடல்நலக்குறைவு காரணமாக நடிகர் டெல்லிகணேஷ்(80) காலமானார். நாயகன், அபூர்வ சகோதரர்கள், சங்கமம், அவ்வை சண்முகி, இந்தியன் 2 ஆகிய படங்களில் நடித்தவர்.

கடந்த 3 நாட்களாக அவருக்கு உடல்நிலை சரியில்லை. உடல்நிலை காரணமாக அவ்வப்போது மருத்துவமனையில் அனுமதிக்கப்பட்டு சிகிச்சை பெற்று வந்தார். இப்படிப்பட்ட நிலையில் 3 நாட்களுக்கு முன் அவரின் உடல்நிலை மோசமானது.

உடல்நிலை பாதிக்கப்பட்டு அவர் படுத்தப்படுக்கையானார். இப்படிப்பட்ட நிலையில் நேற்று இரவு உறங்க சென்றவர் பெரிதாக நகராமல் ஒரே பக்கமாக படுத்ததாக கூறப்படுகிறது. 9 மணிக்கு உறங்க சென்றவரை சோதித்ததில் 11.30 மணிக்கு அவர் மரணம் அடைந்தது உறுதி செய்யப்பட்டது.

இந்த நிலையில் வயோதிகம் காரணமாக சிகிச்சை பலனின்றி மரணம் அடைந்தார். நீண்ட நாட்களாக வயோதிகம் காரணமாக அவரின் உடலில் ஏற்பட்ட பிரச்சனைகள் காரணமாகவே அவர் மரணம் அடைந்தார். மற்றபடி அவரின் மரணத்திற்கு வேறு முக்கியமான நோய் காரணங்கள் எதுவும் இல்லை என்று கூறப்படுகிறது. அவரின் மறைவிற்கு தமிழ்நாடு முழுக்க பிரபலங்கள் பலரும் இரங்கல் தெரிவித்து வருகின்றனர்.

400க்கும் மேற்பட்ட படங்களில் நடித்துள்ளார். திரைப்படங்களுக்கு முன்பு, அவர் டெல்லியை தளமாகக் கொண்ட நாடகக் குழுவான தட்சிண பாரத நாடக சபாவில் உறுப்பினராக இருந்தார். கணேஷ் இந்திய விமானப்படையில் 1964 முதல் 1974 வரை பணியாற்றினார், அதற்கு பின் திரைப்படங்களில் நடிக்க வேண்டும் என்று அந்த பணியில் இருந்து விலகினார். விலகினார். இவருக்கு டெல்லி கணேஷ் என்ற மேடைப் பெயர் கே.பாலசந்தரால் வழங்கப்பட்டது.

பட்டின பிரவேசம் (1976) திரைப்படத்தில் கே.பாலசந்தரால் தமிழ்த் திரைப்படத் துறைக்கு அறிமுகமானார். 1981ல் எங்கம்மா மகாராணி படத்தில் ஹீரோவாக நடித்தவர் கணேஷ். பெரும்பாலும் துணை நடிகராக அல்லது நகைச்சுவை நடிகராக நடித்தார். ஏன் நிறைய குறும்படங்களில் கூட நடித்துள்ளார். அதே சமயம் அவர் அபூர்வ சகோதரர்கள் (1989) போன்ற படங்களில் வில்லன் வேடங்களில் நடித்துள்ளார். இது போன்ற வேடங்கள் பெரிய அளவில் கவனிக்கப்பட்டன.

பாசி (1979) திரைப்படத்தில் நடித்ததற்காக தமிழ்நாடு மாநில திரைப்பட விருது சிறப்புப் பரிசைப் பெற்றார். அன்றைய முதல்வர் ஜெ.ஜெயலலிதா வழங்கிய கலைமாமணி (1994) போன்ற பல்வேறு மாநில விருதுகளையும் பெற்றார். சிந்து பைரவி (1985), நாயகன் (1987), மைக்கேல் மதன காம ராஜன் (1990), ஆஹா..! (1997) மற்றும் தெனாலி (2000) ஆகிய படங்களில் இவரின் நடிப்பு கவனிக்கப்பட்டது.

கடந்த 3 நாட்களாக அவருக்கு உடல்நிலை சரியில்லை. உடல்நிலை காரணமாக அவ்வப்போது மருத்துவமனையில் அனுமதிக்கப்பட்டு சிகிச்சை பெற்று வந்தார். இப்படிப்பட்ட நிலையில் 3 நாட்களுக்கு முன் அவரின் உடல்நிலை மோசமானது. உடல்நிலை பாதிக்கப்பட்டு அவர் படுத்தப்படுக்கையானார். இதையடுத்து நேற்று இரவு அவர் உயிர் பிரிந்தது என்று குடும்பத்தினர் மூலம் அறிவிக்கப்பட்டு உள்ளது.

https://tamil.oneindia.com/news/chennai/what-is-the-reason-behind-the-demise-of-delhi-ganesh-653241.html

ஆழ்ந்த அஞ்சலிகள்..

Edited November 10, 20241 yr by புரட்சிகர தமிழ்தேசியன்

நல்ல ஒரு குணசித்திர நடிகர்.
அவரின் நடிப்பில், மெல்லிய நகைச்சுவையும் இடையே கலந்திருக்கும்.
ஆழ்ந்த அனுதாபங்கள்.

தலைமுறைகள் தாண்டி தொடர்ந்த முகம் – டெல்லி கணேஷ்

christopherNov 10, 2024 12:49PM

டெல்லி கணேஷ். தமிழ் சினிமாவுல இப்படி ஒரு நடிகரை பார்த்ததில்லை என்று சொல்கிற அளவுக்கு தனித்துவமானவர். திரைக்கு முன்னும் பின்னும் பல லட்சம் ரசிகர்கள் வாஞ்சையோடு உற்றுநோக்குகிற ஒரு மனிதர்.
இவரது இயற்பெயர் கணேசன்.

1944ஆம் ஆண்டு ஆகஸ்ட் 1ஆம் தேதி திருநெல்வேலி மாவட்டம் வல்லநாட்டில் பிறந்தவர் கணேசன். ஒரு சகோதரி, ஒரு சகோதரன், சிற்றன்னை பிள்ளைகள் என்று கூட்டுக்குடும்பத்தில் வளர்ந்தவர்.

கிராமத்து வாழ்வுக்குரிய குறும்புகளும் சேட்டைகளும் நிரம்பியது அவரது பால்யம். பள்ளிப்படிப்புக்குப் பிறகு கல்லூரியில் சேர விரும்பிய கணேசன், குடும்பச்சூழல் காரணமாக வேலைக்குச் செல்ல வேண்டிய நிலைக்கு ஆளானார்.

பதின்ம வயதுகளில் பிழைப்பு தேடி தொடங்கியது கணேசனின் முதல் பயணம். மதுரையில் தனியார் நிறுவனமொன்றில் வேலை பார்த்தபோது, விமானப்படை தேர்வு குறித்த அழைப்பைக் கண்டார். அந்த தேர்வில் தேர்ச்சி பெற்றவர், 1964இல் விமானப்படையில் சேர்ந்தார்.

டெல்லி தொடங்கி நாட்டின் எல்லைப்பகுதிகளில் சேவையாற்றும் பணி. போர்க்காலச் சூழலை நேரில் கண்ட அனுபவம். அனைத்துமாகச் சேர்ந்து, கணேசனின் மனதில் சில கேள்விகளை எழுப்பியது. வாழ்வு குறித்த பார்வையும் மாறியது.

அந்த காலகட்டத்தில், போரில் காயமடைந்த வீரர்களுக்காக நடத்தப்பட்ட கலை நிகழ்ச்சிகளே அதற்கான மருந்தாக அமைந்தது. நாடகங்களில் சின்னச் சின்ன பாத்திரங்களில் நடிக்கத் தொடங்கிய கணேசன், ஒருகட்டத்தில் விமானப்படையில் பெரும்பாலானோருக்குத் தெரிந்த முகமாக மாறினார். டெல்லியிலுள்ள தென்னிந்திய நாடக சபை நாடகங்களில் நடிக்கத் தொடங்கினார்.

பத்தாண்டு கால விமானப்படை வாழ்க்கை போதுமென்று தோன்றியபோது, சென்னை திரும்புவதே கணேசனின் எண்ணமாக இருந்தது.

1974இல் சென்னை திரும்பிய கணேசன், காத்தாடி ராமமூர்த்தி உட்பட அப்போதிருந்த நாடக கலைஞர்களின் குழுக்களில் இணைந்து நடித்தார். அதன் வழியே தனக்கென்று அபிமானத்தையும் பெற்றார்.

அப்படி நடித்த ஒரு நன்னாளில், இயக்குனர் கே.பாலச்சந்தரின் பார்வையில் விழுந்தார் கணேசன். அதன் விளைவாக, அவர் இயக்கிய ‘பட்டினப் பிரவேசம்’ படத்தில் முருகன் என்ற பாத்திரத்தில் நடித்தார். அதன் தொடர்ச்சியாக, ‘ஏர்ஃபோர்ஸ்’ கணேசன் என்ற பெயர் டெல்லி கணேஷ் என்றானது.

நாடகம், சினிமா என்று இரட்டைச்சவாரி கண்ட டெல்லி கணேஷ் மிகச்சிறந்த நடிகர் என்பதை அடுத்தடுத்து வந்த ஜெயபாரதியின் ‘குடிசை’, துரையின் ‘ஒரு வீடு ஒரு உலகம்’ போன்ற படங்கள் தெரியப்படுத்தின.

அதன் அடுத்தகட்டமாக, துரையின் ‘பசி’ படத்தில் நடித்து தீவிர சினிமா ரசிகர்களுக்குப் பிரியமானார்.

‘பொல்லாதவன்’ படத்தில் ரஜினிகாந்தோடு மல்லுக்கட்டும் பாத்திரத்தில் நடித்தபிறகு அனைவருக்கும் தெரிந்தவராக மாறினார்.

‘எங்கம்மா மகாராணி’ போன்ற சில படங்களில் நாயகனாக நடித்தபோதும், எந்தப் பாத்திரத்திலும் நடிக்கத் தயாராக இருந்தார் டெல்லி கணேஷ். அதனால், இளம் வயதிலேயே மிகச்சிறந்த குணசித்திர நடிகர் என்ற பெயரைப் பெற்றார்.

ராஜ பார்வை, புதுக்கவிதை, எங்கேயோ கேட்ட குரல், சிவப்பு சூரியன், டவுரி கல்யாணம் என்று தொடர்ந்து மேலேறியது அவரது கிராஃப்.

அச்சமில்லை அச்சமில்லை, கல்யாண அகதிகள் என்று தொடர்ந்து பாலச்சந்தரின் படங்களில் இடம்பிடித்த டெல்லி கணேஷுக்கு ஒரு மகுடமாக அமைந்த படம் ‘சிந்து பைரவி’. அதில் மிருதங்க வித்வானாக தோன்றி, ரசிகர்களின் கண்களில் கண்ணீரை பெருக்கெடுக்க வைத்தார்.

இன்னொரு பக்கம், விசுவின் குடும்பச் சித்திரங்கள் பலவற்றில் டெல்லி கணேஷின் பங்களிப்பு ஒரு அங்கமாக அமைந்தது.

சம்சாரம் அது மின்சாரம் படத்தில் டெல்லி கணேஷ் தோன்றிய காட்சிகள் மிகக்குறைவு. ஆனால், அப்படி அவர் நடித்த காட்சிகள் அனைத்திலும் வீரியம் அதிகம். அதனை இன்றும் நாம் உணரலாம்.

புன்னகை மன்னன் படத்தில் கமலின் தந்தையாக டெல்லி கணேஷ் நடித்த பாத்திரம் அருவெருப்பை ஊட்டக்கூடியது. பின்னர் ‘நாயகன்’ படத்தில் அவரோடு தோன்றிய பாத்திரம் நம்மை நெகிழ்வூட்டியது.

தொண்ணூறுகளில் ரஜினிகாந்த், கமல்ஹாசன், விஜயகாந்த், பிரபு, கார்த்திக், சத்யராஜ் என்று பல நாயகர்கள், நாயகிகளோடு டெல்லி கணேஷ் நடித்த படங்கள் இன்றும் ரசிகர்கள் நெஞ்சில் நீங்காமல் இருக்கின்றன.

நடிக்க வந்த மிகச்சில ஆண்டுகளிலேயே நாயகன், நாயகியின் தந்தையாகத் தோன்றியவர், சில படங்களில் கொடூர வில்லனாகவும் நடித்திருக்கிறார்.

ருத்ரா, பட்டத்து ராணி, ஜாதி மல்லி என்று ஒரேநேரத்தில் அவர் நடித்த பாத்திரங்களில் ‘வெரைட்டி’ தெரியும்.

மைக்கேல் மதன காமராஜன், அவ்வை சண்முகி, பொற்காலம், ஆஹா, பொன்மனம், காதலா காதலா, தொடரும், பூவெல்லாம் கேட்டுப்பார் என்று டெல்லி கணேஷ் நடிப்புக்கு உதாரணம் காட்டப் பெரும்பட்டியலே உண்டு.

2000ஆவது ஆண்டுக்குப் பிறகு விஜய், அஜித், சூர்யா, சிம்பு, மாதவன், விக்ரம், விஷால், விமல் என்று அடுத்த தலைமுறை நடிகர்களோடும் கைகோர்த்தார் டெல்லி கணேஷ்.

தீயா வேலை செய்யணும் குமாரு, கேடி பில்லா கில்லாடி ரங்கா, பாபநாசம், இரும்புத்திரை போன்ற படங்களில் 2கே கிட்ஸ்களுக்கும் தெரிந்த முகமாகத் திகழ்ந்தார்.

தமிழ் மட்டுமல்லாமல் மலையாளம், தெலுங்கு, இந்திப் படங்களிலும் நடித்திருக்கிறார் டெல்லி கணேஷ்.

தொலைக்காட்சி தொடர்களைப் பொறுத்தவரை எத்தனையோ ஆயிரம் எபிசோடுகள் கண்டிருக்கிறார்.
இவை தவிர தொலைக்காட்சிப் படங்கள், குறும்படங்கள், விளம்பரப்படங்கள் என்று அனைத்திலும் சகலகலா வல்லவனாக திகழ்ந்தார்.

தனக்கு முந்தைய தலைமுறை தொடங்கி அடுத்தடுத்த தலைமுறைகளைக் கடந்து இன்றும் எல்லோருக்கும் தெரிந்த கலைஞனாகத் திகழ்வது சாதாரண விஷயமில்லை.

நடிப்புத்திறமையோடு உலகம் குறித்த நல்லதொரு பார்வையும் சக மனிதர்கள் மீதான நேசிப்பும் இருந்தால் மட்டுமே அது சாத்தியம். அப்படிப் பார்த்தால், கடிகார முள்ளின் நகர்வைப் போல முழுவட்டமான வாழ்வொன்றைக் கண்டவர் டெல்லி கணேஷ்.

அந்த நிறைவாழ்வு மங்காத நிலவொளியாய் ரசிகர்கள் மனதில் என்றும் நிலைத்திருக்கும்.

 

https://minnambalam.com/cinema/a-face-that-has-continued-across-generations-delhi-ganesh/

 

நெல்லை கணேசன் ’டெல்லி கணேஷ்’ ஆக மாறியது எப்படி?

christopherNov 10, 2024 10:40AM

தமிழ் திரைத்துறையில் நகைச்சுவை, வில்லன், குணச்சித்திரம் என்ற எந்த கதாப்பாத்திரமாக இருந்தாலும் அதில் சிறப்பான நடிப்பை வெளிப்படுத்தி வந்த நடிகர் டெல்லி கணேஷ் வயது முதிர்வு காரணமாக நேற்று (நவம்பர் 9) இரவு காலமானார்.

சென்னை ராமாபுரத்தில் உள்ள இல்லத்தில் வைக்கப்பட்டுள்ள அவரது உடலுக்கு திரையுலகினர் நேரில் சென்று அஞ்சலி செலுத்தி வருகின்றனர்.

இந்த நிலையில் கணேசன் என்ற தனது பெயர் டெல்லி கணேஷ் ஆக மாறியது எப்படி என்று அவர் அளித்த பேட்டி ஒன்று சமூகவலைதளங்களில் வைரலாகி வருகிறது.

அதில் அவர், “என்னை சினிமாவில் அறிமுகம் செய்தவர் இயக்குநர் பாலச்சந்தர். என்னிடம் அவர், சினிமாவிற்கு தகுந்த மாதிரி உன் பெயரை மாற்றிக்கொள் என்று கூறினார். அப்போது நான் என்ன செய்வது என்று தெரியாமல் இருந்தேன்.

அந்த நேரத்தில் பாலச்சந்தர் என்னிடம் ‘நீ டெல்லியில் பல நாடகங்களில் நடித்திருப்பதால் உன் பெயரை டெல்லி கணேஷ் என்று வைத்துகொள் என்றார். நானும் அவர் சொன்னவாறு பெயரை மாற்றிவிட்டேன். மேலும் என்னுடைய நிஜ பெயர் கணேசன் தான்’ என்று கூறியுள்ளார்.

டெல்லி கணேஷ் என்ற பெயரின் காரணமாக அவரை பலரும் டெல்லியை சேர்ந்தவர் என்றே கருதுகின்றனர். உண்மையில் இந்தியா சுதந்திரம் பெறுவதற்கு முன்பு ஒருங்கிணைந்த திருநெல்வேலி மாவட்டத்தில் இருந்த வல்லநாடு கிராமத்தில் இவர் பிறந்துள்ளார்.

படிப்பில் கெட்டிக்காரரான டெல்லி கணேஷ் படங்களில் நடிப்பதற்கு முன்பு 1964 முதல் 1974 ஆம் ஆண்டு வரை இந்திய விமானப்படையில் அதிகாரியாக பணியாற்றி உள்ளார். அப்போது நடிப்பில் ஏற்பட்ட ஆர்வத்தின் காரணமாக நாடக குழுவில் சேர்ந்து, பின்னர் சினிமாவில் முக்கியமான நடிகர் ஆனார் என்பது குறிப்பிடத்தக்கது.

 

https://minnambalam.com/cinema/how-did-nellai-ganesan-become-delhi-ganesh/

ஆழ்ந்த அனுதாபங்கள்.

மிகவும் அருமையான குணசித்திர நடிகர் . ........ஆயினும் அவரின் நகைச்சுவை எனக்கு மிகவும் பிடிக்கும் . .......!

ஆழ்ந்த இரங்கல்கள் . ......!

எனக்கு மிகவும் பிடித்த மனிதர்.ஆழந்த அனுதாபங்கள.

எந்தப் பாத்திரம் கொடுத்தாலும் அதை மிகவும் திறமையாக செய்திருப்பார்.

ஆழ்ந்த இரங்கல்கள்.

எனக்கு மிகவும் பிடித்த நடிகர்களில் ஒருவர்.

அன்னாருக்கு என்னுடைய அஞ்சலிகள்............🥲.

நடிகர் டெல்லி கணேஷ் நடித்த பல படங்களில் அதிகம் நான் பார்த்து இரசித்த படம் சிந்து பைரவி.

ஐயாவின் ஆத்மா சாந்தி அடையட்டும். ஓம் சாந்தி!

எத்தகைய பாத்திரங்களும் புகுந்து விளையாடக் கூடிய அற்புதமான நடிகர். அவரின் இழப்பு திரையுலகுக்கு பேரிழப்பு. 
ஆழ்ந்த அனுதாபங்கள்.

நல்ல குணச்சித்திரநடிகர். ஆழ்ந்த இரங்கல்கள்.