காகம் இருந்தும்

கற்றுக்கொள்ள கிளிகளுக்கு

கர்வம் அதிகம்

நிறம் சரியில்லை என்றது

ஆந்தைக்கு முழி சரியில்லை என்றது

பிலக்கொட்டை குருவிக்கு

துள்ளல் துடிப்பு அதிகம் என்றது

உன் சத்தம் மெத்தக் கூடிப்போச்சு என்று

செண்பகம் சொன்ன போது

உனக்கு சோர்வு அதிகம் என்றது

அடக்கி வாசி என்று

அடைக்கலக் குருவி சொன்ன போது

உடைத்து விடுவேன் மூக்கை என்று

பேச்சுரிமை பேசியது

பொந்துக்குள் கிளிகள் பத்திரமாக

தனித்தனியே குந்தியிருக்கின்றது

பொழுது சாயும் நேரத்தில் மட்டும்

கூட்டம் கூட்டமாக

தென்னோலைகளை

கிழித்து விடுவதுடன் அடங்கி விடுகின்றது

அது மார்கழியின் கெற்போட்டம் இல்லை

கார்த்திகையின் கனமழை

காற்றும் வேகமாக வீசி

முன் வேலி முருங்கை

முறிந்து விழுந்தது

கிழிந்த ஓலைகளை பொருத்தி பின்னி

கிடுகாக்கி வேய்ந்தபோதும்

ஓட்டைக்கால்

ஒழுகவே செய்கின்றது

மழை சோவென்று பெய்ய

தென்னை மரப்பொந்தில்

தலை தெரிய குந்தியிருந்த கிளி

பின்னலும் சரியில்லை

வேய்ச்சலும் சரியில்லை என்றது

ஆந்தை ஒன்று பெருமரத்தில்

கூடுகட்டி முட்டை இட்டிருந்தது

பூனை ஒன்று மரத்தை சுற்றி வந்தது

சந்தேகப்பட்ட ஆந்தை

வேகமாக பறந்து

பூனை தலையில் கொட்டியது

தேவையில்லாத வேலை என்று

பொந்தில் இருந்து கிளி

புறுபுறுத்தது

பூனை ஓடி தென்னையில் தாவியது

பொந்தில் இருந்த கிளி பறந்து

முன்னால் நின்ற

தென்னையில் குந்தியிருந்து கத்தியது

பூனை வேகமாக ஏறியது

பொந்தில் தலையை நுழைத்தது

கிளி கத்தோ கத்தென்று கத்தியது

பூனை முதற் குஞ்சை கவ்வியது

கிளி கத்தியது

ஆந்தையே வந்து குட்டு என்று கத்தியது

ஆந்தை முழுசிக்கொண்டு இருந்தது

காகங்களை கூப்பிட்டது

ஒரு காகம் இரையை கண்டு கூப்பிட்டதால்

எல்லாக் காகமும் அங்கே போய்விட்டது

வேலை முடித்த பூனை

அடுத்த மரத்தை பார்த்து ஏவறை விட்டது

இறுதியல் கிளி

இந்த சொண்டை வைத்து

என்ன பிரயோசனம் எண்டு

மீண்டும் கி கீ என்று

கத்த தொடங்கியது.

தலைகீழான கேள்விக்குறி அடயாளம் போல்

கிளியின் சொண்டு

தலை நிமிர்திய போதெல்லம்

அடுத்தவனை கேள்வி கேட்டது

தலை குனிந்த போது

தன்னை தானே கேள்வி கேட்டது

மேலும் கீழும் ஆசையும் கழுத்தை

பக்கவாட்டிலும் அசைத்தால்

கடித்து துண்டாடி விடலாம்

கனமான உண்மை தெரிந்தும்

கிளிகளுக்கு உடன்பாடில்லை

இது படைப்பின் குற்றமில்லை

பரிணாம வளர்ச்சியின் குற்றமில்லை

கீச்சிடும் சத்தம் மேல் வளர்ந்து விட்ட

அதீத நம்பிக்கை.

இலவு காத்த கிளி ஒன்று

என்னொரு பொந்தில் இருந்து

இதை எழுதியது.

வணக்கம் சுகன் .................

பச்சைகிளியின் கதை அருமை ...உகந்தநேரத்தில் பதிந்த தங்களுக்கு நன்றிகள்

.பகுத்தறிவுள்ள மனிதர் ஏனோ பாடம் படிக்க மறுக்கின்றனர் ..கதை அருமை.

சொலிய பாங்கும் மிக அருமை . நன்றிகள் .

வணக்கம் நிலாமதி

கிளி தானும் உருப்படியாக எதுவும் செய்யவில்லை செய்யும் மற்றவர்களிடமும் குறை குற்றம் கண்டு வக்கணையாக பேசி தன்னிருப்பின் பாதுகாப்பையும் கோட்டைவிட்டது. கவிதைக் கிளி........ பலருக்குத் தொப்பி அளவாக இருக்கிறது. நன்றி சுகன் நல்லதொரு படிப்புணர்த்தும் படைப்பு.

எதற்கெடுத்தாலும் குறை கண்டு பிடிப்பார் என ஒரு கூட்டம் உண்டு.

உங்கள் கவிதை அழகு சுகன்.

ம்ம்ம்..... குறியீட்டுக் கவிதை பலருக்கு குறியிட்டுச் செல்கிறதே........

ஆனாலும் எங்களுக்கு வலிக்காது சுகன்,

எங்களது தோல் மேல் அவ்வளவு நம்பிக்கை

கிளிகளைப் போல......

வாழ்த்துக்கள் தொடருங்கள்

என்னதான் இருந்தாலும் கிளி கொஞ்சம் கூடவா பந்தா காட்டிட்டுது எண்டு நினைக்கிறேன்....! கவியின் அமைப்புக்கு பாராட்டுக்கள். கவியின் ஒவ்வொரு வரிகளிலும் உயிரோட்டம் அழகுக்கு அழகு...

வாழ்த்துக்கள்...

பலே பலே சுகன். கவிதை அருமை. நடைமுறையை கவி வடிவில் வடித்த சுகனுக்கு பாராட்டுக்கள். மேலும் பல கவிதைகளை வடியுங்கள்.

மிக மிக சிறந்த கவிதை,இந்த ஒரு கவிதை (உருவகக் கதை) நூறு கவிதைக்குச் சமன். நன்றி.

எனக்கு கவிதைகள் பொதுவாக விளங்குவதில்லை. உங்கள் கவிதை நன்றாக உள்ளது. பாமரனும் புரிந்துகொள்ளும் விதமாக உள்ளது.

இன்னொரு பொந்தில் இருந்து இதை எழுதிய இலவு காத்த கிளி..கீச்சிடாமல் மெல்ல கவிதையால் பேசிய விதம் அழகு ..கீச்சி பழக்கபட்ட கிளிகளுக்கு இதை புரிந்து கொள்வது கொஞ்சம் கடினமே தான்..வாழ்த்துக்கள் சுகன் அண்ணா பல நாட்களுக்கு பின் வித்தியாசமான ஒரு கவிதையுடன் சந்தித்தமைக்கு..

அதிலும் இந்த வரிகள்...(கிளியின் சொண்டுகள் மட்டுமா??)..

தலைகீழான கேள்விக்குறி அடயாளம் போல்

கிளியின் சொண்டு

தலை நிமிர்திய போதெல்லம்

அடுத்தவனை கேள்வி கேட்டது

தலை குனிந்த போது

தன்னை தானே கேள்வி கேட்டது

அப்ப நான் வரட்டா!!