நெய்தல் பாடல்

- வ.ஐ.ச.ஜெயபாலன்

வாழிய தோழி

கடலின்மேல் அடிவானில்

கரும்புள்ளியாய் எழுதப்படும்

புயற் சின்னம்போல

உன் முகத்தில் பொற்கோலமாய்

தாய்மை எழுதப்பட்டு விட்டது.

உனக்கு நான் இருக்கிறேனடி.

இனியுமுன் ஆம்பல் கேணிக் கண்களை

உப்புக் கடலாக்காதே.

புராதன பட்டினங்களையே மூடிய

மணல் மேடுதான் ஆனாலும்

தேர்ந்த கள்ளியான ஆமையால்க்கூட

இங்கு தன் முட்டைகள

நெடுநாள் மறைக்க முடியாதடி.

விரைவில் எல்லாம்

அறியபடா திருந்த திமிங்கிலம்

கரை ஒதுங்கியநாள் போலாகிவிடும்

அதனால் என்னடி

இது நம் முதுகரைக்குப் புதிசல்லவே.

அஞ்சாதே தோழி

முன்பு நாம் நொந்தழ

மணல் வீடுகளை ச் சிதைத்த பயல்தான்.

ஆனாலும் காதல் அவனை

உன் காலில் விழ வைத்ததல்லவா.

ஆளரவமுள்ள சவுக்குத் தோப்புக்குள்

முதல் முயக்கத்தின்போதுகூட அவனிடம்

குஞ்சுக்கு மீன் ஊட்டும் தாய்ப் பறவையின்

கரிசனை இருந்ததல்லவா.

ஆறலைக் கள்வர்போல

சிங்களர் திரியும் கடற்பாலைதான் எனினும்

நீர்ப் பறவைகள் எங்கே போவது.

இனிச் சோழர்காலம் திரும்பாது என்பதுபோல

அவன் நகரக்கூலி ஆகான் என்பதும்

உண்மைதான் தோழி.

ஆனாலும் அஞ்சாதே

அவன் நீருக்குள் நெருப்பையே

எடுத்துச் செல்லவல்ல பரதவன்.

அதோ மணல் வெளியில்

முள்ளம் பன்றிகளாய் உருழும்

இராவணன்மீசையை

சிங்களக் கடற்படையென்று

மீனவச் சிறுவர்கள் துரத்துகிறார்கள்.

இனிக் கரைமாறும் கடல்மாறும்

காலங்களும் மாறுமடி.

_{இனிக் கரைமாறும் கடல்மாறும்}

_{காலங்களும் மாறுமடி.}

_{ம்ம்ம்}

_{தொடருங்கள்.}

ஐவகை நிலங்களின் பாடல்கள் எல்லாவற்றையும் இன்னமும் படிக்கவில்லை. முல்லையும் நெய்தலும் நன்றாகவே அமைந்துள்ளன கவிஞரே!

தோழர் விசுக்கு, நன்றி.காலம் மாறுகிறது எனவே நம்புகிறேன். அன்புகுரிய கிருபனுக்கு என் நன்றிகளும் வாழ்த்துக்களும்.தொடர்ந்தும் உங்கள் அன்பையும் கவிதை ஆர்வத்தையும் நாடுகிறேன்

கவிஞரே நல்ல உவமிப்புகள்

உங்களுடைய சொற்களின் பொருளை மீள மீளப்பார்த்து வியக்கிறது உள்ளம்.... எப்படி இப்படியாக கற்பனைகள் சிகரங்களை எட்டுகின்றன? நீங்களும் கண்ணதாசனைப் போன்று போதையில் கவிதைகளுக்கான வரிகளை கண்டு பிடிக்கிறீர்களா?

இனிக் கரைமாறும் கடல்மாறும்

காலங்களும் மாறுமடி

சிறப்பான பாடல்

இனிக் கரைமாறும் கடல்மாறும்

காலங்களும் மாறுமடி.

நம்பிக்கை தரும் வரிகள் : பிடித்த வரிகளும் கூட.

நிச்சயமாக இந்துசமுத்திரமும் எங்கள் கரைகளும் மாறும் நுணாவிலான். அந்தக் கனவுகளோடுதான் வாழ்கிறோம்

நெய்து கோத்திருக்கின்றீர்கள் நெய்தலை! "இரா-வண்ணன்" மீசையை துரத்தும் கடற்கரை சிறுவர்கள். உங்கள் வயதில்தன்னும் உங்களின் கற்ற்பனைவளத்தினை பெற்றுவிடவேண்டும் என்ற பேராசை எனக்குள் கவிஞரே!

பார்க்கலாம்! இரா-வண்ணன் மீசையை துரத்தி முடித்து மீண்டால் சந்திப்போம்!

அருமை என்ற வார்த்தையைத் தவிர என் எந்த வார்த்தையலையும் உங்கள் நெய்தல் பாட்டின் கரைதொட முடியாது ! நன்றி!

நன்றி பகிர்வுக்கு, அருமையான வரிகள், காலம் மாறும், மீண்டும் மண்ணில் கால் பதிப்போம் என்ற நம்பிக்கையுடன் காலம் ஓடுகின்றது

Thanks Kavithai, Thanks Udaiyar