என்றென்றும் நன்றியுடன்.....

முப்பாலுக்கு அப்பாலும் முதற்பாலாய்

தாய்ப்பாலுடன் தமிழ்ப்பாலும் ஊட்டி

நோய் ஏதும் அணுகாது நோன்பிருந்து

சேயாய் எமை எல்லாம்

செம்மையாய் வளர்த்தெடுத்த தாயே

உனை வாழ்த்த தமிழில் வார்த்தையில்லை

நீ தண்ணீர் ஊற்றி வளர்த்திருந்தால்

நாம் தறுதலையாய் வளர்ந்திருப்போம்

நீயோ கண்ணீர் ஊற்றி எம்மைக்

கண்ணியமாய் வளர்த்ததனால்

உன் கண்ணின் நீரெல்லாம்

ஆனந்தக் கண்ணீராய் மாறியது

கண்ணீரோடு விதை விதைப்போர்

கம்பீரத்தோடு அறுத்திடுவார்

என்று சொன்ன வேதமொழி

என்றும் பொய்ப்பதில்லை

எத்தனை இரவுகள் நீ

உறக்கத்தைத் தொலைத்து விட்டு

எம் இரவுகளைப் பகலாக்க

உன் இரவுகளை இழந்திருந்தாய்

எத்தனை தடவைகள் நீ

உன் கனவுகளைத் தொலைத்து விட்டு

எம் எதிர் காலக் கனவுக்காய்

எரிந்திடும் மெழுகானாய்

சின்னச் சின்னக் கவிதைகளாய்

நாம் சிறகடித்துப் பறப்பதற்கு

மரபுக் கவிதையாய் எம்

மனங்களிலே நிறைந்தவளே

நாம் அகரம் அறிய வைத்த

சிகரம் நீ

எம் சின்ன இதயத்தின்

பெரிய உலகம் நீ

எம் சின்னச் சிரிப்பின்

பெரிய மகிழ்ச்சி நீ

எம் சில்லறை நொடியிலும்

யுகமாய் கனக்கும் மிளிர்வு நீ

இறைவன் தந்த இணையற்ற

பரிசும் நீ

எமக்காக விழித்து

எமக்காக உறங்கி

எமக்காக அழுது

எமக்காக சிரித்து

இன்னும் இன்றும் எமக்காக வாழும்

இறைவனின் எழிலான படைப்பும் நீ

நன்றி என்ற வார்த்தைக்குள்

அடக்க முடியாத நயாகரா நீ அம்மா

இன்னும் பலகாலம் எம்முடன் நீ வாழ

எங்கும் நிறைந்துள்ள

இறைவனை தினம் வேண்டி

என்றென்றும் நன்றியுடன்

இதயத்தால் வாழ்த்துகிறோம்.

என்றென்றும் நன்றியுடன்.....

------

எத்தனை இரவுகள் நீ

உறக்கத்தைத் தொலைத்து விட்டு

எம் இரவுகளைப் பகலாக்க

உன் இரவுகளை இழந்திருந்தாய்

எத்தனை தடவைகள் நீ

உன் கனவுகளைத் தொலைத்து விட்டு

எம் எதிர் காலக் கனவுக்காய்

எரிந்திடும் மெழுகானாய்

சின்னச் சின்னக் கவிதைகளாய்

நாம் சிறகடித்துப் பறப்பதற்கு

------

எமக்காக விழித்து

எமக்காக உறங்கி

எமக்காக அழுது

எமக்காக சிரித்து

இன்னும் இன்றும் எமக்காக வாழும்

------

இறைவனை தினம் வேண்டி

என்றென்றும் நன்றியுடன்

இதயத்தால் வாழ்த்துகிறோம்.

ஒவ்வொருவரின் தாய்க்கும் பொருத்தமான வரிகள். கவிதைக்கு நன்றி கண்மணி.

அன்னையர் தினத்துக் கேற்ப அழகான் கவிதை . பாராட்டு கண்மணி யக்கா ...

......உங்களை நீண்ட நாட்களாக காணோம் .எதிர் பார்க்கிறோம் .

உங்கள் அன்னைக்கும், அன்னையான உங்களுக்கும், எனது தாய், தாய்க்குலத்துக்கு உளங்கனிந்த வாழ்த்துகள்~! வாழ்த்துகள் என்பதைவிட நன்றி என்று கூறுதல் இன்னமும் பொருத்தமாய் இருக்கும் என்று நினைக்கின்றேன்.

கவிதை அற்புதம். அன்னையர் தின வாழ்த்துக்கள்.அம்மா என்றால் மறுதலிக்க ஏது வரிகள்?.

நல்லதொரு கவிதை. பாராட்டுக்கள்.

நல்ல கவிக்கு நன்றிகள் கண்மனி அக்கா....

அணைத்து அன்னையர்களுக்கும் அன்னையர் தின வாழ்த்துக்களுடன் நன்றிகளும் உரித்தாகுக....!

அன்னையர் தினத்தை முன்னிட்டு வந்து இருக்கும் மற்றுமொரு கவிதை இது.மிகவும் நன்றிகள் கண்மணி அக்கா உங்கள் கவிதைக்கு.அனைத்து அன்னையர்களுக்கும் வாழ்த்துக்களும் நன்றிகளும்..

Edited May 8, 201015 yr by யாயினி

"இறைவனின் எழிலான படைப்பு நீ" என்ற வரி என் அம்மாவை என் கண் முன் நிறுத்திய வரிகள்.

வாழ்த்துக்கள் கண்மணி

வாத்தியார்

................

அன்னையர் தினத்தை முன்னிட்டு எழுதிய எனது கவிதையைப் படித்து தம் கருத்துக்களை முன் வைத்தும் பாராட்டியும் வாழ்த்துத்தெரிவித்த தமிழ் சிறி நிலாமதி முரளி நுணாவிலான் ஆராவமுதன் ஈழமகள் யாயினி வாத்தியார் அனைவருக்கும் நன்றிகள் அனைத்து அன்னையருக்கும் அன்னையர் தின வாழ்த்துக் கூறுவதுடன் எமக்கு அன்னை என்ற அந்தஸ்த்தைத் தந்த தந்தையர்க்கும் நன்றிகள்.