எரிகற்கள் விழுந்தழிந்த பூநிலத்தின்,

மீதியான மூத்த குடிகள் நாம்!

எறிகணைகள் விழுந்த நிலத்திலிருந்து

தூக்கியெறியப்பட்ட அகதிகள் நாம்!

விட்டகுறை தொட்டகுறை முடிக்கவென...

நல்லபடி விடியுமொரு நாளிலென... நம்பியிருந்தோம் நாம்!

இழப்புகளும் வலிகளும் எமைத்துரத்த...

ஓடியோடியே களைத்தோம் நாம்!

ஒரு கையில் கைக்குழந்தை... மறுகைதோளில் அதன் தாயின் உடலென

எத்தனை வலிகளை சுமந்தோம் நாம்!

கால்வாசி புலமக்கள் மட்டும்... வீடு பெயர்ந்து வீதியில் போராட,

நடுக்காட்டில் நாதியற்று ஒளிந்தோம் நாம்!

பாதி உலகம் பகலோடு பார்த்திருக்க...

பகையாலே பரிதவித்து அழிந்தோம் நாம்!

மிச்சம் மீதியின்றி சிந்திய குருதியின்...

செவ்வினமான மிச்சசொச்சம் ஆனோம் நாம்!

சில இரவு பல பகலில்... வந்து விழுந்தசெல்லோடு...

சின்னாபின்னமாகிச் சிதைந்து போனோம் நாம்!

கொண்டு வந்த துணிமணியில் இரத்தந் தோய்ந்த பின்னும்,

மனதோடு அம்மணமாய்... அரண் கடல் கடந்தோம் நாம்!

காலிழந்து கையிழந்து... கட்டியவன் தலையிழந்து...

கண்ணீரிலும் செந்நீரிலும் மிதந்தோம் நாம்!

சுமந்த சுமையோடு இலட்சியத்தை இறக்கிவிட்டு...

கண்சிவந்த விழியோடு கதறியழுதோம் நாம்!

இருக்கின்றார் இல்லை... என்பதெல்லாம் இல்லை,

நம்புகின்றோம் அவனை இன்னும் நாம்!

எத்தனை தலைமுறை மாறினாலும்... அவனைமட்டுந்தான்,

தலைவனாய் ஏற்போம் நாம்!

தரணிபோற்ற வாழ்ந்து காட்டியோர் மாவீரர்,

அவர் பாதம் தொழுவோம் என்றும் நாம்!

தலை நிமிர்ந்து தன்மானத் தமிழனாய்

இழந்தது ஈடிணையென நிமிர்ந்து நிற்போம் நாம்!

இன்றல்ல நாளை... அல்லது நாளை மறுநாளேனும் விடியும்!

தியாகங்கள் சுமந்த இலட்சியங்கள் வீணாகாது!

ஒரு நாளல்ல ஒருநாள்... விடிந்தே தீரும்!!!

-நாம்.... தமிழர்!!!

பாதி உலகம் பகலோடு பார்த்திருக்க...

பகையாலே பரிதவித்து அழிந்தோம் நாம்!

மிச்சம் மீதியின்றி சிந்திய குருதியின்...

செவ்வினமான மிச்சசொச்சம் ஆனோம் நாம்!

வாழ்த்துக்கள் என்று சொல்ல மனம் இல்லை கவிதை தொடருங்கோ .

காலத்திற்கேற்ற கவிதைக்கு நன்றி, கவிதை!

போராட்டம் வேறு! அதன் தலைமைத்துவம் வேறு என்பது எனது எண்ணம்!

போராட்டமானது சில இலக்குகளைக் கொண்டது!

தலைமைத்துவம் என்பது, அந்த போராட்டத்தை வழி நடத்துவது!

தலைமைத்துவத்தில் மட்டும் போராட்டம் தங்கியிருக்ககூடாது!

தலைமை மாறும் தன்மை கொண்டது! மாறும்போது புதிய வேகத்துடன் செல்லும் திறமை கொள்ள வேண்டும்!

போராட்டத்தின் இலக்குகள் என்றும் மாறுவதில்லை! வழி முறைகள் மட்டுமே, மாறுகின்றன!

எனது கருத்தும் இதுவே....புங்கை

போராட்டமானது சில இலக்குகளைக் கொண்டது!

தலைமைத்துவம் என்பது, அந்த போராட்டத்தை வழி நடத்துவது!

தலைமைத்துவத்தில் மட்டும் போராட்டம் தங்கியிருக்ககூடாது!

நன்றிகவிதை

நன்றி கவிதைக்கு கவிதை....

நன்றி கவிதைக்கு

அழிவிற்கும் அவலத்திற்கும்

ஒரு நாள் கிடைக்கும் வெற்றி

கவிதைக்கு நன்றி

தமிழினம் பட்ட துயரை மீளவும் அந்த இடத்திற்கு எம்மை இட்டுச் செல்கிறது. தியாகங்கள் ஒருபோதும் வீண் போவதில்லை என்பது உண்மை. வலி சுமந்த நாம் அதனிலிருந்து மீளும் வழியைத்தான் அடையாமல் இருக்கிறோம்.. காலத்திற்கு ஏற்ற கவிதைக்கு நன்றிகள் கவிதை..

நன்றி கவிதைக்கு